سيد اللبن

**اللورد** الأحد أغسطس 24, 2008 7:10 pm

تاريك تجيهم كل صباح والشافعه تلمس أصبعك
إن شاء الله ياسيد اللبن ماتنفعك
والله ياسيد اللبن حاسدك عديل
ودايرك تسيب البيع وأكون أنا ليك بديل

وعلى العليك سيد اللبن دمك تقيل
تاخد تمام من القروش
إن شاء الله قرشاً يبلعك
إن شاء الله ياسيد اللبن ماتنفعك

الزي دا ياسيد اللبن الناس بتتعشم لقاه
إنت الحظوظ ضربت معاك كل يوم تقيف وتنضم معاه
لاكن نضمها كتير عليك
قاصد الرزق والمنفعه
ناسي الجمال والامتثال
ومابتبكي لمن ودعك
إن شاء الله ياسيد اللبن ماتنفعك

والله ياسيد اللبن
حتى الحمار شاف الجمال وقف إحترام
شافك بدون احساس تقيف
لوكان نضم كان قال حرام
واحتج عال
دفق اللبن
وجدع اللمد
ومضغ اللجام
وطفش عديل
ولاحتى فكر يودعك
إن شاء الله ياسيد اللبن ماتنفعك

سيد اللبن عليك جرادلك وبقرتهم
خليني يوم لبان أكون
خليني أعيش في الزول
وأتوه في سحرو
وأغرق في العيون
الزول جميل
وسمح شديد
وشايل محاسن الكون فنون
سيد اللبن خليني بس يوم أبيع
وأديك مضاعف مكسبك
إن شاء الله ياسيد اللبن ماتنفعك