تخيل كيف يكون الحال لو ما كنت سوداني

**اللورد** الأربعاء ديسمبر 17, 2008 9:15 am

كنت ح تلتزم بالمواعيد - كنت ح تدفع فاتورة المحامي او الطبيب قريبك - كنت قاضيت المهندس اللي خرب ليك بيتك - كنت عملت مشروعك بنفسك دون محاكاة - كنت بدأت دوامك في الموعد المحدد - كنت حتنطق حرف ال (ق ) و ال ( غ ) كما ينبغي - كنت بطلت تسف صاعود - كنت صرت متخصص وعالم في مجالك - كنت حتلبس شيك جدا عند خروجك أمام التلفاز وأجهزة الاعلام - كنت تتحدث بطلاقة وإنسيابية بدون أ أ أ أ أ أ - كنت عرفت ان بالدقيقة 60 ثانية وبالساعة 60 دقيقة وباليوم 24 ساعة وفي اليوم ممكن تعمل كذا وتنجز كذا كنت اخترت المساق التعليمي بنفسك و درست الجامعة بالكلية اللي تناسب مقدراتك ومواهبك ورغباتك المستقبلية كنت ح تتصل بالتلفون قبل زيارة أحد في منزله بدري شويه, مش و أنت في خشم الباب...كنت انتظرت دورك في الصف..كنت ح تنهر أولادك لما يبهدلوا ليهم بيت زول...
و كنت ح تتردد في أخذهم معاك المرة الجاية لنفس البيت, علشان يبهدلوه مرة تانية...كنت ح تتردد في إعطاء رقم تلفون أو عنوان شخص ما دون إذنه..كنت ح تتوقع يحصل شنو لما ترقد طفلك الصغير, دون بامبرز في سرير في بيت الناس..وكنت امتنعت عن السماح بجلوس طفلك الرضيع في المقعد الأمامي على حجر والده او والدته...كنت ح تترد في زيارة شخص ما أنصاص الليالي و صابح يوم مدارس و عمل...كنت ح تخلي الصغار في البيت عندما تكون المناسبة مناسبة كبار...-كنت اتونست بصوت معقول, حصوصا' عندما يكون الطرف الأخر قاعد جنبك في نفس الكنبة.. و يا حبذا عندما يكون الطرف الاخر ساكت...كنت امتنعت عن التدخين في منزل شخص اخر, او على الاقل استأذنت قبل ما تولع...كنت ترددت في ارسال حاجات وزنها خمسة كيلو و ما فوق مع كل من تسمع بأنه ماشي السودان...كنت رجعت القروش الاستلفتها في وقتها, أو في الحقيقة رجعتها و بس..كنت امتنعت عن زيارة احدهم في مكتبه , للونسه او مناقشة امور لا صله لها بالعمل كنت خجلت من عدد المسكولات التي تعملها, مش كمان تقول 'شنو يا فردة, خمسه مسكولات ما ترد عليها؟ و الله الفيك اتعرفت'.....

تعرف يا لورد
لو ماكنت في السودان
أو لو كانت الظروف والوضع الإقتصادي في السودان غير ما هو عليه الآن
كنت التزمت بكل ما لا تلتزم به وانت كما تعيش اليوم
لو اتغير الوضع
ومعليش على العبارة دي لان الوضع مابتغير من نفسو لازم يغيروه الناس العايشنو
كنت حسيت بي الفرق
السوداني ما كسلان حباً في الكسل
ولامجامل لدرجة العباطة حبا في المجاملة
السوداني مجامل لأن الناس حوليك محتاجين للمساعدة
وكسلان لان المشوار حيكلفو وقوف في الموقف لانتظار الحافلة
والحافلة وقفوها ناس المرور
والكمساري عمل مشكلة مع السواق
والطريق مقفول لانو في عربية ضربت كفر
والكهربا قاطعة
و
و
و
و....
وانت ماغريب عشان يحكو ليك باقي الحكاية

تخيل كيف يكون الحال لو ما كنت سوداني

تخيل كيف يكون الحال لو ما كنت سوداني

بدون تخيلات